DIDA WA TIMES FM AELEZA KISA CHA KUTUKANWA NA MKE MDOGO WA MZEE YUSUPHU

Mtangazaji wa Kipindi cha Mitikisiko ya Pwani kupitia Times FM, Khadija Shaibu ‘Dida’ amefunguka na kuzungumzia sababu ya kutukanwa katika mtandao wa kijamii na mke mdogo wa Mzee Yussuf, Chiku.
Mzee Yussuf Jumanne hii aliamua kuwaondoa wake zake wawili Leyla Rashid na Chiku katika mtandao wa Instagram baada ya kuwa wanatupiana maneno machafu kupitia mtandao huo hali ambayo inadaiwa ilikuwa inamchafua mume wao.
Akizungumza na Bongo5 Ijumaa hii, Dida amedai alitukanwa na Chiku ambaye ni mke mdogo wa Mzee Yussuf kwa madai alikuwa anampendelea mke mkubwa wa Mzee Yussuf, Leyla Rashid.
“Kusema ukweli kila mtu anajua jinsi wake zake Mzee Yussuf, Leyla Rashid na Chiku pamoja na wifi yao walivyokuwa wanarushiana matusi. Lakini mimi kama mimi niliwaHi kuzungumza na Chiku na baadaYe Leyla, lakini nilianza Chiku. Kila mmoja alikuwa anaeleza tatizo nini na kwanini wamekuwa wakitukanana katika mitandao ya kijamii, hawaoni kama wanamuaibisha mume wao! Basi kila mmoja akawa anazungumza kwa pande wake, siku nimezungumza na Leyla akazungumza mambo mengi sana, sasa Chiku baada ya kusikia akawa ananitukana mimi kupitia mitandao,” amesema Dida.
“Mimi binafsi sikumjibu vibaya nikawa namuelewesha nini maana ya uke wenza lakini akawa anaendelea kunitukana. Nikasema Mzee Yussuf ndiye anaweza kumaliza tofauti zao, ngoja nimtafute ili nizungumze naye, akakubali lakini siku ambayo aliniambia nitaongea naye akaniambia amepata dharura na pia hawezi kuja na kuzungumzia mgogoro wa familia yake kwani ataumaliza mwenyewe,” alisema Diva.
Bongo5 ilijaribu kumtafuta Mzee Yussuf ili kuzungumzia suala hilo kwakuwa linamshushia heshima yake, lakini alikataa na kusema tayari ameshafunga ukurasa wa kuzungumzia masuala ya wake zake kwenye vyombo vya habari.
Pia Mzee Yussuf alidai tayari ameshawakataza wake zake kutumia mtandao wa Instagram kwa kuwa ndio chanzo cha ugomvi wao huku na yeye akijipanga kuondoka katika matumizi ya mtandao huo.
Hata hivyo Bongo5 haikuishia hapo, ilizungumza na mtu wa karibu wa Mzee Yussuf ambaye hakutaka kutajwa jina lake na kueleza jinsi mgogoro huo unavyomuumiza kichwa Mzee Yussuf.
“Kweli amewaambia hakuna mtu kutumia mitandao wa Instagram na atakayetumia kwa siri ndiyo talaka yake. Unajua haya mambo huwezi kujua nani ni mkorofi kwa sababu unashangaa tu mambo yamezuka na huwezi kuelewa chanzo chake ni nini. Lakini hii hali inamuumiza sana Mzee kusema kweli, sema watu wa nje wanamchukulia poa,” alisema.
Chanzo:Bongo5

Filed Under: MZEE YUSUPHU on Thursday, March 10, 2016

MZEE YUSUPHU AFUNGUKA BAADA YA WAKE ZAKE KUCHAMBANA INSTAGRAM

WAKATI wanawake duniani kote leo wakiadhimisha siku ya wanawake duniani, wake wa mkurugenzi wa kundi la Jahazi Modern Taarabu, Mzee Yusufu, Leila Rashid na Chiku wamekatazwa kutumia tena mtandao wa Instagram.

Wanawake hao wamekatazwa kutumia mtandao huo na endapo watatumia kwa siri mume wao huyo amewaeleza kwamba ndiyo itakuwa talaka yao.

Mzee Yusufu amechukua uamuzi huo baada ya hivi karibuni kuzuka kwa majibizano ya wake zake hao kwenye mitandao ya kijamii ikiwemo Whatsap na Instagram.

Akizungumza kwenye mahojiano na kipindi cha taarabu kinachorushwa na Redio Clouds, Mzee Yusufu, alisema mtandao huo ndio chanzo kikubwa cha kukuza mgogoro huo.

“Nimewatoa wake zangu wote kwenye mtandao huu ambao ndio nimeona umekuza sana mgogoro huu na mimi pia nipo njiani kutoka katika akaunti hiyo ili ibaki kwa ajili ya kazi tu na endapo nitagundua yeyote ana simu ya siri ambayo anaitumia kuingia kwenye mtandao huo ndiyo itakuwa talaka yake.

“Hivi tunavyozungumza wake zangu wote hawana akaunti za Instagram, zinazoendelea kusambaza maneno ni majina feki na ndiyo nimeshaamua hivyo,” alisema.

Mtanzania

Filed Under: MZEE YUSUPHU on Tuesday, March 8, 2016